/ Խրատանի Սրբոց / Սբ. Հայրերը պահքի մասին

Սբ. Հայրերը պահքի մասին

Սբ. Հայրերը պահքի մասին

ՍԲ. ՀԱՅՐԵՐԸ ՊԱՀՔԻ ՄԱՍԻՆ

    Քանի որ պահք չպահեցինք, դրա համար էլ դրախտից դուրս նետվեցինք: Ուրեմն, պահք պահենք, որպեսզի նորից դրախտ մտնենք:

     Ինչքան որ մարմնից ես խլում, այնքան հոգուն ես ուժ տալիս:

    Որովայնը պայմանագրերի մեջ ամենահավատարիմ դաշնակիցն է, ոչ մի բան չպահպանող մի մառան. եթե դրա մեջ շատ բան է դրված, ապա իր մեջ վնաս է պարունակում, իսկ դրվածը չի պահպանում:

    Զգուշացեք պահքը կերակրից հասարակ հրաժարման հետ նույնացնելուց: Նրանք, ովքեր կերկարից հրաժարվում են, բայց իրենց վատ են պահում, նմանվում են սատանային, ով, թեև ոչինչ չի ուտում, այնուամենայնիվ մեղանչելուց չի դադարում:

Սբ. Բարսեղ Մեծ

    Մարմնի պահքը հոգու կերակուրն է:

     Անհնար է, որ կրակը ջրի մեջ վառվի. ապաշխարությունն էլ առանց պահքի է անհնար:

     Հաստ որովայնը նուրբ միտք չի ծնի:

Սբ. Հովհաննես Ոսկեբերան

    Հոգին ոչ մի բանով այնքան չի խոնարհվում, որքան` եթե որևէ մեկը կերակուրի մեջ ժուժկալ լինի:

     Երբ Դավիթն առյուծի հետ էր մարտնչում, նրա կոկորդից էր բռնում: Մենք էլ, եթե կոկորդն ու որովայնը զսպենք, ապա Աստծո օգնությամբ անտեսանելի առյուծին (սատանային) կհաղթենք:

Աբբա Պիմեն

    Դևերի պարագլուխն անկյալ Արուսյակն է, իսկ կրքերի գլուխը` շատակերությունը:

    Տիրապետիր որովայնին, քանի դեռ նա քեզ չի տիրապետել:

Սբ. Հովհան Կղեմաքոս

     Փայտը որքան շատ է, կրակն այնքան ուժեղ է. որքան կերակուրներն են շատ, այնքան էլ տռփանքն է մոլեգին:

     Ավելորդ կերակուրը մարմինը դարձնում է չափից ավելի բեռնավորված նավ, որը ալիքների նվազագույն շարժման դեպքում խորտակվում է:

Աբբա Ղևոնդիոս

     Կենդանիներից ո՞րն է առյուծի պես զորեղ. բայց իր որովայնի պատճառով նա էլ է որոգայթի մեջ ընկնում, և այնժամ նրա ողջ զորությունը հպատակվում է:

Սբ. Հովհաննես Կարճահասակ

     Եթե քեզ շատ ու համեղ կերակուրի հեշտանքն է գրգռում, ապա հիշի՛ր դրանից առաջացող գարշահոտությունը ու կհանգստանաս:

Աբբա Եսայի

     Որկրամոլն աշխատում է ու տրտմում նրա մասին, թե ինչպե՞ս իր որովայնը կերակուրներով լցնի, իսկ երբ ուտում է, մարսողության ժամանակ է տանջվում: Բայց պահեցողությունը առողջությամբ ու սթափությամբ է ուղեկցվում:

Սբ. Եփրեմ Ասորի

     Երբեք չի կարող կատարյալ մաքրության հասնել նա, ով հույս ունի այն ձեռք բերել լոկ պահեցուղությամբ, այսինքն` մարմնական պահքով, եթե չգիտակցի, որ պահեցողությունը պետք է նրա համար, որպեսզի մարմինը պահքով խոնարհեցնելուց հետո, ավելի հեշտորեն կարողանա պայքարի մեջ մտնել այլ կրքերի հետ:

Աբբա Սրապիոն

     Որովայնին տիրապետու՞մ ես: Լեզվին էլ տիրապետիր, որպեսզի երբ մեկի ստրուկն ես մնում, մյուսից ազատագրումն էլ անօգուտ չլինի:

Սբ. Նեղոս Սինայեցի

    Քաղցած գայլը նախիրն է հետապնդում, իսկ պոռնկության դևը` որովայնը լցնողներին: Հացդ կեր` կշեռքով այն չափելով, ջուրդ էլ չափով խմիր, և այնժամ պոռնկության դևը քեզանից կփախչի:

Աբբա Եվագր Պոնտացի

Տերն անապատում,

Քառասուն օր պահք պահելով,

Վերջում քաղցեց`

Մարդկությունը ցույց տալով:

Հոգի՛ իմ, մի՛ տրտմիր.

Եթե թշնամին քեզ վրա հարձակվի,

Աղոթքով ու պահքով,

Քո ոտքերի տակ կջախջախվի:

Սբ. Անդրեաս Կրետացու Մեծ կանոնից:

Պատրաստեց` Գ. Ղազարյանը

© www.orthodoxkyanq.org