/ Վարք Սրբոց / Սբ. Նեկտարիոս

Սբ. Նեկտարիոս

Սբ. Նեքտարիոս

մետրոպոլիտ Պենդապոլսի և սքանչելագործ

Նոյեմբերի 9/22

Սբ. Նեկտարիոսը (մկրտության անվամբ` Անաստաս) ծնվել է 1846 թ., Թրակիայի Սիլիվրիա քաղաքում, Դիմոս և Վասիլիկի Կեֆալասների բարեպաշտ ընտանիքում: Սուրբն ընտանիքի հինգերորդ տղան էր:

Անաստասը նախակրթությունն ստանում է ծննդավայրում, սակայն քանի որ նրա ընտանիքը աղքատ էր, 14 տարեկան հասակում որոշում է Կ. Պոլիս գնալ` այնտեղ միաժամանակ ուսանելու և աշխատելու: Պոլսում Անաստասն աշխատանքի է անցնում իր ազգականներից մեկին պատկանող ծխախոտի գործարանում: Հակառակ նրան, որ աշխատանքի դիմաց չէին վճարում, և նա դժվարանում էր անգամ օրվա հացը վաստակել, պանդխտական կյանքի դժվարություններն ուսումնատենչ պատանուն չեն խոչընդոտում անքուն գիշերները հոգևոր ընթերցանությանը նվիրելու:

Պոլսում Անաստասը որոշում է Սուրբ Երկիր ուխտի գնալ: Ծովային ճամփորդության ժամանակ նավը խորտակելու աստիճան մի մեծ փոթորիկ է բարձրանում: Սուրբը հողմահույզ ծովն է նետում Կենաց Փայտի մասունքով իր վզի խաչը, և սարսափելի փոթորիկն անմիջապես դադարում է: Անաստասը սակայն շատ է տխրում` խաչից զրկվելու համար: Երբ նավը ափ է հասնում, մեծ ուրախությամբ գտնում են խաչը, որ կպած է լինում նավի հատակին: Սա սուրբի առաջին հրաշքն էր:

Տիրոջ Գերեզմանի միաբաններն ուրախությամբ են ընդունում բարեպաշտ երիտասարդին, և Անաստասը Երուսաղեմում է ապրում մինչև քսան տարեկան դառնալը: Այնուհետև նա Հունաստանի Քիոս կղզին է գնում, որտեղ և 7 տարի գրաճանաչություն է դասավանդում գյուղացի երեխաներին:

Սակայն սրբի ցանկությունն էր վանական դառնալ. 1877 թ. նա վանական հերակտրություն է ստանում Քիոսի Նորավանքում, ապա սարկավագ է ձեռնադրվում` Նեկտարիոս անունն ստանալով:

1881-1885 թթ. Նեկտարիոս սարկավագն ուսանում է Աթենքի ազգային համալսարանի Աստվածաբանության ֆակուլտետում: Համալսարանն ավատելուց հետո Ալեքսանդրիա է մեկնում, որտեղ քահանա է ձեռնադրվում և Պատրիարքությունում որպես քարտուղար աշխատում:

1889 թ. սբ. Նեկտարիոսը Պենդապոլիսի (Եգիպտոս) մետրոպոլիտ է ձեռնադրվում: Նեքտարիոսն սրբազանն իր հովվապետական պարտականությունները նախանձախնդրությամբ և պատասխանատվության խորը զգացումով է կատարում, սակայն նրա վառ անհատականությունն ու գործունեությունը որոշ կեղերականների նախանձն է գրգռում: Նրանք զրպարտում են Նեկտարիոսին առ այն, իբր նա պատրիարք դառնալու հավակնություններ ունի: Զրպարտիչները հասնում են այն բանին, որ սուրբը անարգանքով վտարվում է Ալեքսանդրիայի պատրիարքությունից:

Անիրավ կերպով հալածված սբ. Նեկտարիոսն Աթենք է գալիս: Այստեղ նա երկար ժամանակ աշխատանք չէր գտնում և հաճախ նույնիսկ հանապազօրյա հացից էր զրկված` ծայրահեղ թշվառ պայմաններում ապրելով: Վերջապես նրան Խալկիդա քաղաքում նրան քարոզիչ են նշանակում: Այս ծառայության ժամանակ էլ բացահայտվում է, որ Ալեքսանդրիայի պատրիարքությունում սրբին զրպարտել են, և սրբի անմեղությունը բոլորին հայտնի է դառնում:

1894 թ. սբ. Նեկտարիոսն Աթենքի Ռիզարիոսյան ճեմարանի տնօրեն է նշանակվում: Սուրբը ճեմարանը օրինակելի վարքով էր ղեկավարում. նա անսահման սիրով էր լցված ուսանողների նկատմամբ` կիսելով նրանց բոլոր հոգսերն ու կարիքները:

Տնօրեն եղած ժամանակ սբ. Նեկտարիոսն Էգինա կղզում մի հին ու փոքր վանք է գնում: Բազում զոհողություններով այդ հին վանքը կարողանում է նորոգել և մեծացնել: 1908 թ.` ճեմարանը 14 տարի շարունակ տնօրինելուց հետո, սբ. Նեկտարիոսն առողջության պատճառով հրաժարվում է տնօրենի պաշտոնից ու մնացած կյանքը Էգինայի վանքում անցկացնում:

Խոնարհ ու պարզ սուրբը մասնակցում էր վանքի բոլոր աշխատանքներին` միչև իսկ բանվորներին օգնելով: Միաժամանակ նաև գիտական ուսումնասիրություներ էր կատարում ու գրքեր գրում: Իր հեղինակած բազմաթիվ և բազմաբնույթ աշխատություններից են «Քրիստոսի Եկեղեցու Տիեզերական ժողովները», «Աշխարհում Աստուծո Հայտնության մասին», «Քրիստոնեական բարոյագիտության դասեր», «Հովվական Ատվածաբանության դասեր», «Ուղղափառ Քրիստոնեական», «Քրիստոսաբանություն», «Հերձվածի մասին» երկերը: Սբ. Նեկտարիոսը գրել է նաև Սբ. Երրորդությանը նվիրված 30 և սբ. Աստվածածնին ձոնված 154 շարականներ:

Սբ. Նեկտարիոսը վանքում ապրում է մինչև 1920 թ., երբ հիվանդանության մահիճն է ընկնում: Ծանր ցավերով նա տեղափոխվում է Աթենք, որտեղ և «Արետեիոն» հիվանդանոցում իր մաքրամաքուր հոգին առ Աստված է ավանդում նոյեմբերի 9-ին:

Սբ. Նեկտարիոսի երանելի ննջումից անմիջապես հետո կատարավում է նրա առաջին հետմահու հրաշքը. երբ հիվանդապահներն ու սրբին խնամող Եվփիմիա միաձնուհին հանգուցյալ սրբի շորերն են փոխում, նրա ներքնաշապիկը դնում են կողքի մահճակալին, որին ոտքերից անդամալույծ հիվանդ էր պառկած: Այդ պահին հիվանդն անմիջապես բժշկվում է:

Բացի այդ, սրբի անձնական բժշկի վկայության համաձայն` սբ. Նեկտարիոսի մարմինն արդեն իսկ մահվանից անմիջապես հետո անուշահոտ մյուռոն է արտադրել, և նրա վիրակապերն այն աստիճան են բուրել, որ դրանք որոշել են ոչ թե դեն նետել, այլ սրբի հետ թաղել:

Էգինայում ամփոփված սբ. Նեկտարիոսի մարմինն ավելի քան քսան տարի անապական է մնացել` որպես Սբ. Հոգու անոթ անասելի անուշահոտություն բխելով:

1961 թ. Կ.Պոլսի Տիեզերական Պատրիաքությունը սինոդական որոշմամբ սրբերի շարքն է դասում սբ. Նեկտարիոսին և նրա հիշատակը պաշտոնապես գրացում եկեղեցական տոնացույցում:

Սբ. Նեկտարիոսն ամբողջ աշխարհում մեծ համբավ ունի` որպես սքանչելագործ և բժշկող սուրբ: Աշխարհի տարբեր անկյուններում նրա անունով բազմաթիվ տաճարներ կան, նրա հրաշքների մասին` բազմալեզու հրատարակություններ: Սբ. Նեկտարիոսի կատարած հրաշքների մեջ մեծ թիվ են կազմում մահացու քաղցկեղի բժշկությունները:

 

Սբ. Նեկտարիոս